مقتطف من محاضرة الدين ورجال الدين ١٩٦٩

مقتطف من محاضرة الدين ورجال الدين عبر السنين (٦) عام ١٩٦٩
الاستاذ محمود محمد طه
النقل من عندي والنص قد تشوبه اخطاء من النقل
تجدون المقتطف هنا
يبدأ في الجزء السادس الدقيقة ١٤:٠٢٣
http://www.alfikra.org/talk_view_a.php?talk_id=3

(الدين هسه عند فقهاءنا هو الصور المحفوظة عندهم والمتداولة من..حتى الشريعة بعدت شوية جا الفقه... الشريعة هو ما كان عليهو امر نبينا .. الفقه جا بينا وبينو... فيهو صِنعة بقا.. الفقهاء اتخذوا الدين مهنة... وكل صاحب مهنة بيضع ليها من القواعد ما يحرسها حتى انت ما تدخل فيها مجازفة الا تجي من بابو هو ... كل صاحب مهنة بيعمل كدا ...يقعّدها وينظّمها ويبوّبها بالصورة اللي تجعلو هو جهة الاختصاص. من سوء الحظ انو الدين ما حقّو يقع بالوضع دا لكن وقع ....وقع بالصورة دي.. ولذلك تجد الصوفية انهم كانوا بيقولوا عن الفقهاء انهم اصحاب حِرفة... الغزالي يقول عن الفقيه انو محترف...انت طبيب وانا مهندس وهو صاحب فقه محترف...والفقه مش هو العلم والمعرفة اللي بيهو الناس ورثة الأنبياء، ورثة الأنبياء العارفين بالله، و العلماء القلت ليك "انما يخشى الله من عباده العلماء" العارفين بالله، ما من طريق للمعرفة بالله الا عن طريق الشريعة، الشريعة هي الوسيلة لأن تعرف الله، لكن الشريعة عقدها الفقه فيما بعد وأبعدها عن أصولها.. حتى بقت الناس يشتغلوا في تحصيلها اتناشر سنة وما يعملوا بيها حاجة.  قبيلك في شريعة نبينا ما كان بقول ليهم: فرائض الوضوء سنن الوضوء مستحبات الوضوء، يحكوها ويحفظوها زي ما بيعملوا لينا هسه الفقهاء...كان بالهيئة : صلوا كما رأيتموني أصلي، اتوضو كما رأيتموني أتوضأ....ديننا دا دين الأميّين... نبينا أميّ وأمتو أميّة...فكان الاعرابي يجي ينيخ الراحلة هنا ..ويجي ربع ساعة ..النبي كان يتوضا قدامو هو يعرف كيف يتوضأ ويصلي قدامو هو يعرف كيف يصلي...ثم ينصرف يوروه كيف يصوم ...اذا كان هو ما ناوي الحج في الموسم دا ما بوروهو حاجة عن الحج ... اذا ما عندو ابل ليزكيها ما بوروهو زكاة الابل... اللهم الا اذا كان هو أمثل أهل القرية، وأهل القرية عندهم ابل ليزكوها ببقا فرض عين عليهو ان يعينهم بالتعليم بالصورة دي ...لكن من المؤكد انو مافي نوافل في العمل دا...تعلم وتعمل....اصلو دينا مربوط العلم بالعمل..ولما جا قال من عمل بما علم اورثه الله علم ما لم يعلم ..يعني أن تعلم من الشريعة ما لا يصح العمل الا بيهو...القدر دا من الشريعة دين...ما زدت عنو انت لتعلم الناس وتاخد عليهو أجر ..دا حرفة...ان بقا ما بتاخد عليهو اجر لأنو مثلا اهلك جهلاء وانت بتعلمهم احتسابا لله.. مش بتصلي بيهم بالقروش..مش بتعلمهم بالقروش...يبقى دا تابع لدينك.. لكن مجرد انت احترفتو لتعلموا الناس وتتخذو مهنة... مؤكد دي مسألة تانية تبقى..قد يكون الانسان مأجور اذا كان بيعمل بيهو يعلموا بنموذج يضربو هو للناس...لكن لو الانسان بيعلموا بالصورة المكرورة الهسه دي...وتعيش عليهو.. زي ما هسي عندنا في المعهدالعلمي وفي الازهر وفي كل كلياتنا الدينية الأبعدتنا عن حقيقة الدين..من المؤكد انو انصراف عن الواجب. اتقوا الله ويعلمكم الله.. من عمل بما علم اورثه الله علم ما لم يعلم...هو دا الدين في بساطتو..تعرف شريعتو الما بتصح عبادتك الا بيهو وتعملو..بعدين العبادة كمان وسيلة للعمل التاني...العبادة مش مقصودة في ذاتها...العبادة للمعاملة...اذا كنت انت بتختلي بالله في التلت الأخير من الليل لتصلي بيهو دا سر بينك وبين الله...يجب ان تظهر قيمتو في معاملتك للناس...مش تجي تظهرو للناس ..مش تستطيل بيهو.. في الحقيقة تتواضع بيهو..لتكون للناس نافع.. الخلق عيال الله فأحبهم الى الله انفعهم لعياله... اهو ديننا بينبعث في البساطة دي ..بالرجوع لسنة النبي..وكل القشور دي يجب تزول من وجه الدين.. القشور دي لسوء الحظ قايمين بيها ناس بيورونا انو دي هي الدين ومافي دين غيرها ..حتى هسه الكلام الأنا بقولو دا ينكر كل الانكار مع انو في حقيقة الدين أصل...لكن لأنهم ما عرفوا غير ما عندهم ولأنهم افتكروا انو الدين هو الصور البياخدوا بيها الورقة الشهادة بعد اتناشر سنة في الدراسة...افتكروا انو كلو ما لا يعلمونه هم.. ما هو في الدين ..نبينا عندو حديث يقطع القلوب الحقيقة في المسألة دي.. قال ان من العلم –المعرفة بالله- ان من العلم كهيئة المكنون لا يعلمه الا أهل العلم بالله فإذا تكلموا به لا ينكره إلا أهل الغرة بالله ..اهل الغرة بالله هم البفتكروا انهم عِلموا كلّو ما عند الله.. مغرورين بالله يعني.. انحنا بنتكلم عن الدين ورجال الدين في المعنى دا انو عقبة حقيقية قدام الدين من يسمون رجال الدين ..في ديننا الاسلامي مافي رجال دين..لكن ادركتنا حياة الأمم القبلنا في اليهودية في وفي النصرانية في..في النصرانية بصورة خاصة..في البابا والقسس المن بعدو..ديل في أمر الدين ما بينازعوا ..هم الحجة الأخيرة، حتى يقول ليك يمكنك ان تنازع القسيس في كل شي لكن في الدين لأ، هو الحجة..سارت المسألة دي بالصورة دي احنا ورثنا صورة منها بقا عندنا رجال يتزيوا بزي معين ويلتزموا سمت معين ومسكنة معينة ليقولوا انهم هم الجهة العندها الخشوع وعندها الورع وعندها المعرفة ..وأنا وانت مش شغلنا في الدين.. نجي نسألهم هم..والفرية دي مشت علينا...هسه الشباب المثقف يشعر بمعرة لو جهلتو انت في الاشتراكية او جهلتو في الديمقراطية او جهلتو في الوجودية او في الماركسية ..لكن يقول ليك في الدين والله انا ما عارف حاجة..والله انا ما عارف الحديث البقول كدا او القرآن البقول كدا ..ما نقص عندو...لأنو بشعر انو مش هو جهة الاختصاص..في ناس يسألوا عن المسألة دي...انا بفتكر المسألة دي لا بد ان تزول من أذهاننا بوضع رجال الدين في موضعهم...انهم هم ديل الحقيقة الحقّروا الدين واظهروهو بالمظهر المنفر عنو...ما عاشوا ليهو اطلاقا.. عاشوا بيهو على طول المدى...ومشوا بيهو ورا السلطة في أي صورة من صورها...واتطوعوا يطلعوا من طريقهم ليفتوا للسلطة... حتى الما مسئول منهم.. يمشي للسلطة يتطوع ليفتي..ودا عبر التاريخ.. نحن يمكن دينّا ما ضاق الصفا بتاعو الا في التلاتين سنة الأولانية على عهد نبينا وعهد ابوبكر وعهد عمر..بدوا الناس بعد داك يقولو والله نحنا قلوبنا مع علي وسيوفنا مع معاوية..ويقولوا الأكل مع معاوية أجسم والصلاة مع علي أتم...وجات الفتن وجات المفارقات والناس اصلو صورتم ديك على خير لكن جوه في الاخر صور منهم قريبة من عهدنا احنا...ًصور أؤكد لكن انهم ماهم من الدين في شي اطلاقا..اطلاقا..مش الحكاية دي ما مبالغة..سيرة معوجة...في الكذب وفجور والسحنة الدينية دي نفسها غطا...انحنا هسي عندنا بيننا وبين محكمة الردة..ما عملنا فيهو غير أخرجنا صور من عدم الأمانة في النقل...أفتكر يقشعر ليها البدن...ثم هؤلاء يدرسون ابناءنا اليوم في المعاهد الدينية وفي الجامعة الاسلامية..ولم يرفع أصبع لغاية اليوم ليقول بأي حق انتو بتشوهو النقل دا ثم أنتم معدودون لتعليم النشء الدين...فاقد الشي لا يعطيهو...انسان امانة في النقل ومنها بتنكشف بسرعة ما عندو...نحن بندفع ليهو عشرات الجنيهات ليعلم ابناءنا شنو؟ ما حد سائل في أمر الدين...الوقت الحاضر في عويل كتير بإسم الدين وبكا كتير بإسم الدين...كلو لأغراض...وكلو شعبنا مهدد بأن يجوز عليهو...شعبنا طيب..ِشعبنا مؤمن ...ِشعبنا بسيط...بإسم الدين يمكن أن ينخدع...خدعتنا الطائفية مدى حياتنا نحن شايفنها...هسه في حاجة اسمها الدستور الاسلامي...الدستور الاسلامي يقومو بيهو رجال الطائفية...اهو دا نحن عندنا هسي تلغراف من واحد للامام الهادي: يرجو المصلون الجمعة بمسجد أنصار السنة المحمدية بالعرضة بأمدرمان من سيادتكم تنفيذ قيام الدستور الاسلامي الذي عملتم له وتعملون له في لجنة الدستور والجمعية التأسيسية. قف. معنون للإمام الهادي. دا للصحف معنون للإمام الهادي. أنصار السنة...أنا شخصيا عندي معاهم اصدقاء كتيرين وبداية الحركة الدينية كانت عندهم دار هنا نحن بنمشي ليهم نقول ليهم انتو كلو مجهودكم موجه للشعب..جعلتو بأسو بينه...الأوليا والقبب والأضرحة..هي دي مشكلتنا نحن؟ قدامنا الانجليز هسه ..اهو دا الاستعمار.. خلونا نحنا الناس اللي عندهم دعوة للدين واتجاه للدين يقومو قدام الحركة دي ليواجهو الاسعمار اهو دي المشكلة اذا انتو كنت شايفين كل الفجورالشايفنو  دا اسبابو الاستعمار في الأصل ولا يستقيم الظل والعود أعوج واجهوا الناس ديل.. قالوا والله انحنا جمعية دينية طيب يا جماعة انتو بتعرفوا ما في فرق بين الدين والسياسة انتو جمعية دينية معناها يجب ان تواجهو السياسة ..رئيسم قال والله كلامكم دا صحي لغاية ما نعدل الدستور.. اليوم يجوا يطلبوا من الطائفية الاستغلت العقيدة في تضليل الشعب لتولى الدستور الاسلامي ...ناس كانوا في جميع الوقت متخلفين عن التضحية وعن المواجهة ..يجوا اليوم لأنو الأمر بقا سليم بل حتى مافي مواجهة الطائفية...تمليق للسلطة الطائفية.. ليضعوا مخدرات الشعب السلطة الزمنية عند الطائفية لتستغلها كما استغلت العقيدة ...اهو دا.. تجي أوضاع اتكلم عنها السيد اسماعيل الأزهري اتكلم عنها كلو واحد من الناس ديل..ماشين في جهالات ما ليها من قرار ..مافي معرفة بالدين انما هي صور من الأوضاع السياسية بيستغل فيها الدين ليكمم أفواه الناس وليجهل الناس ويغفلهم ويسوقوا البلاد دي بمؤامرة بالشكل دا لترجع حتى عن المكاسب الوجدتها على يدي الاستعمار.. اهو اليمانية ما استعمروا طول وقتهم..نفضوا الإمام..جا جمهورية..عاوزين حكم مدني ..ليه؟ لأنو الدين ما عاوزنو اليمانية؟ لكن لأنو في جهالات بتمر بإسم الدين ضاقوا بيها ذرعا...المواقف دي البتمر في الدين ورجال الدين يجب أن تستمر إلى أن ينكشف الموضوع دا.. وأنا بفتكر انها دي بتجوز على ناس كتيرين لأنو ناس كتيرين ما بيعرفوا انو ده ما دستور اسلامي انو اسم مسروق هنا ومستعار وانو الجهالة دي عاوزة تلبس قداسة الاسلام لتختفي عن أعين الناس و النقل .... ما شايف في الميدان دا غير الحزب الجمهوري...الحزب الجمهوري بيقدر يقول لانو عندو فكرة عن الدين غير فكرهم.. لكن أي واحد من اقوى الاخوان جدا..اهو مثلا زي بابكر عوض الله او عبدالخالق او شدو لمن يجو..الواحد مواجه بأحد أمرين ولا ما يكون عاوز الدستور الاسلامي ودا ما يمكن ان يقولو انسان زاتو على أي حال يمكن ان يوصم بسرعة بالخروج عن الدين او يسكت عنو لأنو ما عارف ليهو بديل ..فأنا بفتكر انو الوضع دا بيلقي على الحزب الجمهوي مسئولية كبيرة جدا في أن يبرز في انو الدستور الاسلامي هو المطلوب لكن الدستور الاسلامي لا يمكن ان يجي من الشريعة الاسلامية..الشريعة الاسلامية فرع...وانو في بعض صورها لا بد ان تتجدد لتطويرها  للأمام لترتفع من الفروع للأصول..وأنو الدستور الاسلامي في القرآن ...وانو القرآن ما معروف عند الناس..القرآن ما معروف.. ونحنا هنا قلنا انو لم يفض الاوائل من القرآن غير ختم الغلاف .يعني غير اللغة ..وحل القران في مستوى التفسير باللغة ما هو القرآن...وانما هو فهم المفسر للقرآن...نحنا هسي اتكلمنا عن آيات الآفاق.. عندك ابن عباس اللي هو حبر الأمة... في تفسيرو قال وإذا الشمس كورت واذا النجوم انكدرت قال ذهب نورها وسقطت في البحر لأنو في زمن ابن عباس مع مجهودو هو في العبادة وفي التوحيد وفي المعارف...لكن الثقافة المعاصرة ليهو في ايات الافاق كانت انو الأرض مسطحة وأنو الأرض هي مركز الوجود وهي ثابتة وانو الشمس هي المتحركة وأنو النجوم زي ما يعطيها البصر قدر العنب او قدر البللي ملايين منها يقعوا في نهر النيل ...بعدين الناس عرفوا من ايات الافاق ما انتو عارفنو ..أصغر نجم ثابت اكبر من الشمس والشمس أكبر من الأرض تلتمية مرة ...فهل نحن نقول انو تفسير ابن عباس وتفسير الزمخشري وتفسير البيضاوي هو عمدتنا في أن نعيد ديننا ؟ ثم نقول نحن ابن عباس قال عن اذا الشمس كورت واذا انجوم انكدرت ذهب نورها وسقطت في البحر ..أبن عباس خدم وقتو بفهمو للقران في مستوى رفيع ..الخطأ ما بكون خطأ ابن عباس ..بكون خطأنا نحن إذا كان نحنا بنكون عالة على الفهم الماضي.. ما من تفسير هو القرآن او حجة على القرآن ..التفسير هو فهم المفسر للقرآن ...وفهم المفسر للقرآن مرهون بمجهودو الفردي و باستعدادو الفردي.. مجهودو في العبادة وفي العلم واستعدادو الفردي..ثم مرهون بثقافة عصرو... اذا كان نحن بنعيش في الوقت دا وما فهمنا من القرآن ما يحل مشاكلنا الحاضرة لا يمكن أن نكون إلا دعاة ضد الدين مش دعاة للدين ..أنحنا الجمهوريين بنفتكر انو رجال الدين هم العقبة الحقيقية من رجال رسميين في القضاء ومن رجال تعليم في المعاهد ..ولا بد ان يكشفو على حقيقتهم ليرد الشعب المعين الصافي ان شاء الله بعد ان تزول منو الزبدة المغطياهو والأسن الرايم عليهو في اللحظة الحاضرة.