خمس علامات تقول إن رئيسك لا يحبك

المقال مترجم من مدونة سودانية بتصرف مني

http://sudaneseoptimist.wordpress.com/

أولا: بيخونك مع دولة اخرى

ضبطته أكتر من مرة بيرسل هدايا لدولة مزة ساكنة جمبك كنت دوما بتشك في علاقتو بيها، مثلا اخر مرة رسل ليها هدايا بقيمة  ميتين الف راس من الماشية، والحاجة دي بتجرحك خاصة وإنك قبل فترة قاطعت اللحوم بسبب غلائها . وفي شك برضو من علاقة مريبة مع دولة اسيوية اخرى، ودولة خليجية حلوة وصغيرونة

ثانيا: عمره ما استمع ليك

عمره ما كان موجود رغم احتياجك ليهو ،ولو إنو ما عندو حتة تانية يمشي ليها بعد ما اوباما عصرو، فيعني مفروض وقتو كلو يكون ليك، لكن دا ما بيحصل! عمره ما اخد رايك في اي قرار مصيري أو تافه بيخص مستقبلك ، ووضح ليك اكتر من مرة إنو رايك ما بيهمو، وما حيستحمل منك أي راي مخالف لرايو

ثالثا: بيكره ناس بيتكم

اترجيته اكتر من مرة إنو يتعرف على ناس بيتكم ، لكنه محاربهم من يوم ما علاقتو بيك ابتدت . وفي النهاية مع اصرارك على استمرار علاقتكم مع بعض؛ ناس بيتكم قرروا إنهم يهجروك ويهجروه في استفتاء مصيري في 9 يوليو 2011 ، والمؤلم إنو ولا سألك عن احساسك ساعتها، الموضوع كلو سبب ليك انهيار عصبي وعاطفي، لكنك تكاد تقسم إنك سمعتو بيبرطم "في ستين داهية"

رابعا: مخبي فلوسو منك

إنتو على علاقة مع بعض منذ اكثر من عشرين سنة، ومع ذلك فاتح حساب بنكي في الخارج منفصل عنك ، ومش مسموح ليك حتى تسأل عن الفيهو كم. شايفك وإنت بتعاني على مدى عشرين سنة من ضائقة مالية ولا فكر مرة حتى إنو يساعدك

خامسا واخيرا: بيعتدي عليك لفظيا وجسديا

في الأول استحملت اساءاته اللفظية لأنك حسيت وقتها إنو بينفس عن غضبو تجاه الاخرين وإنو بيحاول يحميك. ويومتها لما قال لناس كدا إنهم "تحت مركوبو" شكيت في منو المقصود بالضبط لكن قررت تعديها. ثم تطور الأمر وبدا يسيء ليك لفظيا ويقول ليك
"الحس كوعك" و حلف عليك حلفانات كتيرة (ما من النوع البشجع العلاقة الزوجية) وبقى ما في حد لتهديداتو ضدك، ثم انتهى بيهو الامر إنو يعتدي عليك جسديا كل ما خالفت أمرو

إذا دكتاتورك ابدى أي من العلامات الخمس الفوق دي ..ان الاوان إنك تفكو عكس الهوا وتشوف ليك شخص تاني يحبك ويقدرك...انت تستحق ذلك