Saturday 10 December 2011

نص الحوار الذي اقيم معي حول استقالتي من المؤتمر الوطني

نص الحوار الذي اقيم معي حول استقالتي من المؤتمر الوطني
تحذير لضعاف النفوس: هذا النص متخيل، اي محاولات لفهمه على أنه حقيقي قد يؤدي إلى نتائج مؤذية: كنوبات نضال مفاجيء، أو هلوسات وطنية متخيلة أو حمى ثورية موسمية
--: لا شك ان الاستقالة التي تم نشرها عبر الشبكة بتاريخ 11/12/2011 أثارت جدلا واسعا في الأوساط الالكترونية، وبين زملائك واصدقائك و.....
ميسون النجومي: بالتأكيد! بالتأكـ....
--: ...وأهلك.. لسبب رئيسي: هو أن احد لم يعلم بانتمائك لحزب المؤتمر الوطني من أصله، لماذا الاعلان عن الاستقالة، ما الذي حدا بك لنشرها؟
ميسون النجومي: "لأن التاريخ سيجرّمني"***
--: "  ؟!  " 
ميسون النجومي: وسبب اخر، اريد أن اقطع الطريق أمام محاولات ضمي من جديد
--: ذكرت في الاستقالة أنك كنت عضوا في المؤتمر الوطني منذ...اا..منذ وقت مبكر جدا، منذ عام 1998
ميسون النجومي: صحيح..أول تكليف تنظيمي تسلمته كان في 5 اغسطس عام 1998
--: يعني متذكرة التاريخ بالتفصيل!
ميسون النجومي: هو لا ينسى، دا اليوم التم الاعلان فيهو عن "مقتل" محمد عبدالسلام
--: وشنو كان نوع التكليف؟
ميسون النجومي:  هو دا تحديدا...مقتل محمد عبدالسلام..
--: قتلته؟؟؟ محمد عبدالسلام؟؟؟؟؟
ميسون النجومي: لا لم اقتله ..قلت لك ..التكليف كان "مقتل محمد عبدالسلام"
--: الحديث يبدو لي مشوشا، لكن قبل أن استوضحك..علي أن أذكر أنك كنت عضوا في تنظيمات سياسية عدة، هل كان انتماؤك متقطعا للمؤتمر الوطني؟
ميسون النجومي: لا... انضمامي لحزب الأمة و حركة القوى الجديدة الديمقراطية –حق، لم يؤثر اطلاقا على عضويتي بالمؤتمر، هو لم يكن محبذا ، لكنه لم يكن مؤثرا..فالتنظيم مرن ويسمح بمثل هذه الانتماءات طالما انها لا تؤثر على انجازي للتكاليف التنظيمية
--: غواصة يعني؟
ميسون النجومي: يمكنك قول ذلك..
--: وذكرت في الاستقالة أنه كان لك منصب هام جدا ومركزي في التنظيم...كيف لم نسمع بك في اي من الوسائط الاعلامية ولم يطرأ لك ذكر
ميسون النجومي: ما إنتي عارفة إنو دي قاعدة عامة في كل التنظيمات المغلقة. دائما الأهم ،محرك الأشياء..الدينامو..لا اسم له
--: علي أن اصارحك أن حديثك بمثل هذا البرود عن قتل محمد عبدالسـ
ميسون النجومي: ..مقتل..
--: (بغضب) مقتل محمد عبدالسلام وعن طبيعة انتمائك المشبوهة..اجده مقرفا
ميسون النجومي: البرود كان جزءا من التكليف
--: (بنرفزة واضحة) طيب ما هي التكاليف التي كانت موكلة إليك..و تحديدا في مـ قـ تـ ل محمد عبدالسلام
ميسون النجومي: عشان تفهمي طبيعة التكاليف لازم اول اشرح طبيعة التنظيم ثم تفاصيل  الانتماء نفسه
--: (ممتعضة) باختصار إذا امكن
 ميسون النجومي: جدا !! المؤتمر الوطني تنظيم السلطة، مش لأنه قام بالانقلاب في يونيو 89 ، كلمة "سلطة" ما صفة أو اسم. السلطة تتواجد فقط – زي ما بقول ميشيل فوكو- بتتواجد فقط في شكل فعل متكرر وفي وجود علاقة تسلط (متسلط- مسلط عليه)...عشان تكون جلاد، لازم يكون زول حاني ضهرو مش؟ لو مافي زول حنا ليهو ضهرو ببقا زول شايل سوط ساي.  عشان المؤتمر الوطني يتمكن أنو يكون تنظيم سلطوي لازم يقوم بفعل التسلط بشكل متكرر ودائم..إذا توقف لثانية عن الفعل دا، بيبقى بطبيعة الحال خارج السلطة. من هنا كان الكلام: أن كل سلطة ضعيفة. باختصار المؤتمر الوطني في السلطة لأنو بيتسلط كلو يوم من 89 ما اخد راحة ولا يوم.
--: الحاجة دي لكن متعبة ومنهكة
  ميسون النجومي: وهنا تكمن الكنتة... كدا جينا لقصة انتمائي للتنظيم وبعدين حأتكلم عن المهام الحساسة الأوكلت لي.
--: اتفضلي
ميسون النجومي: طيب أنا قلت ليك إنو لازم التنظيم عشان يكون تنظيم سلطة إنو يعمل الحاجة دي بشكل متكرر وإنو لازم تكون في شكل علاقة مع المتسلط به... فعلا الحاجة دي منهكة.. العمل دا جبار، ما في تنظيم مهما كانت قوتو بيقدر عليهو، عشان كدا بيلجأ للتسليب
--: التسليب؟؟ دا شنو دا كمان؟
ميسون النجومي: كالاتي (( بطبيعة الحال السلطة بتعتبر الناس عدو. دا الطبيعي. بتشوف إنو مهمة الشعب هي إنو يكون لا مبالي- مطيع-ممتثل- سلبي و المهمة بتاعت الشعب دي مهمة جدا، هتلر و فرانكو ما كان ممكن يحققو الحققوهو لولاها)) نعوم تشومسكي القال الكلام دا. أهو نوع الانتماء دا بالنسبة للمؤتمر الوطني أهم وأقيم بكتير من الولاء ليها. بل دا هو نوع الانتماء البتعتمد عليهو في وجودها اكتر من حكاية الولاء الفعلي. لأنو إنتي عارفة إنو أي ولاء مهما كان متجرد عندو كلفة عالية جدا. التنظيم قدر يحقق الحاجة دي، في ملاحظة بقولوها الناس ، إنو النظام كان عنيف جدا في بداياتو، لحدي نهاية التسعينات العنف دا خف شديد، دا لأنو النظام قدر يحقق التسليب بشكل مذهل.
--: بس لو ممكن تقولي لينا دورك في مقتل محمد عبدالسلام كان شنو؟
ميسون النجومي: (مقتل محمد عبدالسلام) دي كانت المهمة الأولى، إني أردد لروحي: مقتل...زي مقتل 5 اشخاص اثر انقلاب حافلة بطريق مدني الخرطوم... او مقتل رجل مسن لانهيار  بير السايفون..  أني اقول مقتل ما اغتيال، دا الجزء الأول من المهمة.. الباقي كان اكثر تعقيدا، وكانت كالاتي ..دقيقة .. (أخرجت ملفا اصفرا ، قرأت الصفحة الأولى)، يوم الاعلان عن اغتيال محمد عبدالسلام أنا كنت جاية اسجل في الجامعة، وحصلت مظاهرة صغيرة، لأنو كان التسليب تم تفعيله خلاص، وتاني يوم كان علي إنو أمشي للمحاسب و ادفع قسط الجامعة، بعدها امر على الاقسام عشان اسجل اسمي، بعدها استلمت جدول الحصص، وشربت بيبسي بارد من كشك الصافي في المين رود، وأذكر كان معاي 6 من صديقاتي، بعدها ركبت المواصلات ورجعت البيت، عاينت للتلفزيون شوية، رصيت الغدا، اتغديت مع ناس بيتنا، عاينت للتلفزيون، نمت، صحيت بدري شربت الشاي ببسكويت، رسلت يجيبو عيش وفول للفطور، شلت مصاريف المواصلات ومشيت الجامعة  هي تكاليف ظاهريا شكلها معقد لكن لما تنخرط فيها بتبقى ليك عادية
ونفس التكليف دا اتطلب مني في عدة مرات، يعني ممكن أذكر تكليف احداث جبل مرة، بعد داك بقا اسمها احداث دارفور ، الضرب العنيف للطلبة ايام اعتصامات المطالبة بالاتحاد، اعتقال الناشطين، احتجاجات بنات الداخليات..ممممـ... تجاوزات النظام العام...حادثة اغتصاب صفية... جنوب كردفان (التكليف هنا كان صعب شوية، لكن قدرت امشي السوق واجيب الخضار كما كان مطلوب مني) ،  الاستثمارات الاجنبية وبيع البلد بالقطاعي، الفشل الذريع في تحقيق السلام والكلفة العالية لاتفاقية نيفاشا، ارتفاع الاسعار واحتكار السلع، الفساد المتكرر بشكل يومي مقتل الأطفال المشردين بالمادة السامة ..وهنا بديت أرخرخ في تكاليفي الحزبية.
طبعا تفاصيل التكاليف تغيرت شوية لأني تزوجت وانجبت  وسافرت. لكن بقدر اقول إنو كل الحاجات دي كانت لا يمكن...لا يمكن...لا ...يمكن تتم، دون دوري الحيوي والهام. أنا كنت أهم عنصر في كل العمليات دي، وتقدري من النتائج تستنتجي إني قمت بالمهام دي بنجاح فائق.
لما عمر البشير قال في خطاب جماهيري إنو كل الشعب عضو في المؤتمر الوطني ، الراجل كان بيتكلم بشكل موثق وعندو دلائل ملموسة على الكلام دا، واستمارات الانضمام واضحة و ماثلة قدامو. لكن هسي الوضع تغير
--: تغير كيف؟
ميسون النجومي: ما كنت قايلة إنو التكاليف حقتي عندها اثر مباشر على تشريد اسرة، أو انتحار طفل..عفوا اغتيال طفل لأنو ما قدر يدفع مصاريف المدرسة،..بقيت ما قادرة اواصل التكاليف. فقررت إنو أقدم استقالتي اللي هي مجرد اعلان، ثم الشروع في عملية الخروج من التنظيم
--: يعني إنت لسة ما خرجتي؟
ميسون النجومي: زي ما السلطة فعل متكرر، التغير والتحرر افعال متكررة...اول ما اوقفها برجع تلقائيا عضو في المؤتمر الوطني
--: كلمة اخيرة استاذة ميسون
 ميسون النجومي: اهيب بكل من كانوا معاي في التنظيم إنهم يقدموا استقالاتهم..فورا
--: شكرا استاذة ميسون النجومي.. معانا ايضا بالاستديو الفنانة نوسيم الحتقدم لينا اغنية قائد الاسطول للفنان حامد اب سبح البغنيها للفنان
محمود عبدالعزيز البغنيها للفنانة حنان النيل البتغنيها لسر ور

* المذيعة عضو في النظام برضو 
*** الاشارة لخطاب كاسترو بالطبع: التاريخ سيبرئني




4 comments:

  1. متعه و شكرا على اعلان الاستقالة الجماهيرية
    اشتم رائحة عصمت الفكاهية الساخرة
    تحياتى ليك ولاكرم فقط

    ReplyDelete
  2. رائعة وأنا كمان بستقيل

    ReplyDelete
  3. أعلن عن سخطي ... تباً لكم
    قَدْ طَفَحَ البَوْل
    الرائحةُ عَمَّت الزَّمَّكَان
    يا أصَاغِيرَ الرائِحةِ اْسْكُني
    اخْلِقي النَّشَازَ وعَلِّقِي الرُّوحْ
    إنَّهُ لَكائِنٌ غَرِيبْ
    يُجيبُ ويقول
    شَرُّ الخَيْرِ، هو التَّحوُّلْ
    نُقْصَانُ العَدَم.

    جزء من نص ... اسمو ياخ

    معاً ميسون الاستقالة كل يوم وثانية

    فاروق أسامة

    ReplyDelete