قاعد تجلجل؟ لازم تجلجل؟

قاعد تجلجل؟ لازم تجلجل؟

 

(والجلجلة فعل منحول من اسم جليلة خميس، ومعناهو إنك تصحى الصباح تقش النوم من عينك تسأل: الليلة مافي خبر من جليلة؟ تشيل حلتك على سيد اللبن وتسأله: الليلة ما سمعت حاجة عن جليلة خميس؟ تمد يدك للكمساري تقول ليه: مسئول من الخير اخوي...الحكومة قالت شي في موضوع جليلة خميس؟)

 

أنا بكره التضامن!! تضامنوا مع فلان...تضامنوا مع علان!! ..بكره التضامن عمى.. أحسن الواحد يكون صريح معاكم. الواحد يكون ماشي في الدنيا دي في امان الله..يقولوا ليهو..تضامن! بس!

 أنا بعرف ناس كويسين..بالجد كويسين ...من جوة قلبهم كويسين، بيوجعهم إنو فلان يتألم...أو علان محبوس وما عندو صوت وما عندو ضهر، بيؤرقهم إنو في ناس اتظلموا في هذه الدنيا، وانهم بيستصرخونا لكن صوتهم مكتوم... عشان نكون واضحين....أنا ما من الناس ديل.

 

أنا زولة خوافة جدا جدا.. بخاف من الجلد..بخاف من الحبس..(وكمان جابت ليها ضقليم شعر؟) بخاف من البشتنة..في واطات الله أنا نوع الناس البمشوا على الحيط..جد! عشان كدا طوالي القميص بكون مترب. أي والله ربنا يسألني بخاف!!  لكن...

الله يسامح الزول التلا علي الاية: "من يعمل سوءا يجز به ولا يجد من دون الله وليا ولا نصيرا" ..لا وشنو؟ كما شرحها لي بالنحوي قال لي : كما تدين تدان... الله يسامحك بس :(  ... عشان كدا ما تشوفوا الفصاحة دي..دا خوف أزرق عديييل كدا. أنا عندي عيال...أخاف أقطع الشارع يطسني بص مستعجل وأنا مبطوحة بلفظ في انفاسي الاخيرة أستنجد وما من زول يسمعني...ممكن جدا!! ..كما تدين تدان ... أخاف يجي حرامي يخم الوراي والقدامي ويطقني في راسي فوق البيعة، يجوا الناس يكفروا لي يقولوا : من شلاقتها المصحيها شنو؟

بخاف على أولادي... اها كل التضامن دا..زي تأمين كدا... يعني البني ادم مفروض يعمل كل ما في وسعه في الدنيا دي عشان يؤمن حياته...بما فيها التضامن.

على فكرة أنا قبل فترة كان لقيت لي مخارجة من موضوع التضامن دا، كان بيقولوهو الناس الما دايرين أولادهم يخشوا سياسة ولا يتضامنوا "ولا تلقوا بأيديكم إلى التهلكة" ...ديل ناس فاهمين جدا... ياخ انا كنت مبسوطة بالاية دي بسطة..عشت بيها عشر سنين في ظل الانقاذ دي أنعم بالسلام والطمأنينة...لجدي ما جا اليوم وسمعت الأستاذ محمود بيقول للناس إنتو ما بتقروا الاية من الاول ليه؟ الاية بتقول: "وأنفقوا في سبيل الله ولا تلقوا بأيديكم إلى التهلكة" يعني بذل النفس هو البجنبك المهالك...مش الدسديس والمضاراة.... وإنو الهلاك بيكون في البخل من بذل النفس..طيب خلاص حنتضامن...ان شاء الله يضقلموا كلو وترتاحوا!

 

طيب موضوع جليلة خميس حقيقة محيرني..انا حقيقة أحب أمحص الأمور قبل ما أتضامن.. كالاتي: جليلة خميس سجلت فيديو على اليوتيوب حكت فيهو عن الحاصل في جبال النوبة ..ما حكته بشكل سياسي فج..ولا قالت ناس علان غلطانين وناس فلان كعبين...قالت الحرب لازم تقيف..ليه؟ عشان في نقص في المواد الأساسية و الملح و ده حيعمل مشاكل في نقص اليود عند الاطفال (!!) عشان ود جيرانهم أبوهو عميان ما قدر ينزح من القصف فقعد معاهو في البيت ورسل أولادو الخرطوم...عشان الاسر هناك جرت خلت الوراها والقدامها أولادهم فقدوهم وهم جارين من القصف..قالت اليوم داك وصل لبيتها نازح طفل ..لكن يا ربي ليك الحمد لقى أهله قدامه في الخرطوم.. الكلام دا هي عرفتو من الأسر النازحة الفتحت ليهم حوشها وبقوا يتصلوا بالموبايل عشان يتطمنوا على عقابهم...قالت إنها خلت ولدها وراها هناك..وإنو ما عندها منو أي خبر..وإنو نفسيتها تعبانة.

 

 

دا جانب

الجانب التاني جهاز الأمن قبض على جليلة بعدة تهم ..قال إنو في اجتماعات بتدار في بيتها وانها تابعة لحركات مسلحة وانها عاوزة تسقط النظام وانها مهدد للأمن القومي..بحسب تحريات جهاز الأمن.

دا الجانب التاني

الحيحسم الموضوع دا و الحيبت في هذا الأمر هو القضاء...في محكمة حيتم فيها الفصل بين الجانبين.

طيب جميل... كل شي ماشي كويس أنا مطلوب مني شنو يعني؟

المفروض كل زول يلتزم "اختصاصو" ..جليلة: وكلت محامين عنها... الشرطة وجهاز الأمن ونيابة أمن الدولة: اتحروا ووجهوا اتهامات... القضاء: حيفصل في الموضوع.

أما نحن... فعلينا أن نكون مراقبين لكل العملية البتحصل هنا ..لعلكم ما عارفين...لكن الدولة عبارة عن مكنة...إنت عزيزي المواطن: الزيت. إنت الزيت البيضمن إنو كل مفاصل المكنة وكل مكوناتها بتمشي بسلاسة. (في ناس بيفتكروا المكن بيمشي كدا بسلاسة من نفسو...لا لا ...ما حصل في تاريخ أعظم وأرقى الحكومات في أكثر الدول تحضرا انها مشت بدون زيت...أقصد بدون مراقبة مواطن...ما حصل! نعوم تشومسكي قال في ناس بيفتكروا إنو الحكومات قاعدة تدي الناس حقوق كدا ساي..ظرافة منها...لم يحدث ذلك على مر التاريخ..كل حق ممنوح كان في البدء: مطلوب)

المطلوب مننا أن نتأكد أن جليلة خميس مهيأ ليها كل الظروف لتقديمها لمحاكمة عادلة وسلسلة..وإنو في كل حقوقها محفوظة لحين قيام المحكمة..حقوقها يعني أنها ما معرضة لأي ضغوط ، أنو كرامتها محفوظة.

لحدي هسي البنعرفو هو في بيان طالع من (الهيئة السودانية للدفاع عن الحقوق و الحريات) إنهم قلقين من بعض الانتهاكات:

1- ظروف احتجاز جليلة خميس، حيث تم تعريضها للحبس الانفرادي لمدة شهرين كاملين

2- عمليات ارهاب نفسي حيث يتم استدعاء جليلة خميس من قبل ادارة السجن واخبارها أن حكما بالإعدام قد صدر في حقها.

بيان صادر عن قرفنا يوضح الانتهاكات التالية:

1- ظروف الاعتقال كان فيها مخالفة صريحة للقانون حيث تم احتجاز جليلة خميس دون تهمة موجهة إليها لمدة 5 أشهر 2- غير مسموح للفريق الدفاع الراغب في الدفاع عنها مقابلتها أو الاطلاع على مجريات القضية والمعلومات اللازمة لهم للقيام بمهمتهم

 

فيديو مصور من اسرتها تتحدث عن ملابسات اعتقالها فيما اسموه اختطافا بشكل مهين بحيث لم يسمح لها حتى تغيير ملابس النوم، وبدون اعلام أسرتها أو اعلامها عن جهة احتجازها.

دا جانب تكرم باخطارنا عن ما يجري للأستاذة جليلة خميس، نحن الان دايرين لجنة تحقيق و بيان من جهاز الأمن ومن ادارة السجن ومن حكومتنا الموقرة للرد على كل ما ورد أعلاه، نريد بيانا يوضح حالة المعتقلة، ونريد أن نعرف الضمانات المقدمة لقيام محاكمة عادلة ومستقلة

 

قول:

"انا....................................... أود من الحكومة ان تقام لجنة تحقيق محايدة ومستقلة تقدم لي بيانا مفصلا حول ضمانات سير اجراءات محاكمة جليلة خميس بشكل قانوني وعادل ومستقل. وإلا فأننا نرى أن كل العناصر مكتملة ومهيئة لإعلان "شطب الدعوى" "

في خوف حقيقي من أنو جهاز الأمن قاعد يستعمل الاعتقال في حد ذاته كوسيلة تعذيب إذا ما استدلينا بقضية أبو ذر الأمين و قضية عبد المنعم رحمة ...أعتقال مطول يصل للعام ثم إفراج

و ده شي خطير جدا ....بيجبرنا أنا نواجه قانون الأمن الوطني و المطالبة بإدخال تعديلات على القانون تضمن سير العدالة في البلاد

 

حملة التضامن  مع جليلة مستمرة لحدي يوم 18  نوفمبر …لأ …نستمر  لحدي مانلقى اجوبة على أسئلتنا

أنا مسئوليتي كمواطن اسال ….ده اختصاصي …و في انتظار الاجابة ... لازم نفضل نجلجل  

عزيزي المواطن...كديه جرب...كن الزيت

وتذكر...كما تدين تدان...لو سكت عن حق زول...بكرة لن تعدم من يسكت عن حقك.



مامون التبيعة 3 : للكاتب عماد عبدالله

مامون التبيعة

"في سيرة الظل من العويش إلى اللبلاب"

3

خريف:

قالوا : أمطرت الدنيا …

فسحبوا ما في الحوش كله لداخل البرندتين , و ما يزال الراديو الأزرق الكبير المضبوط على إذاعة لندن " يشخشخ " كلما أرعدت أو أبرقت السماء , فتتضاير بت المرين و تزوم متطيرةً تقول : (الليلة يا بركة شيوخي حوالينا و ما علينا , الحوبا بيك يا ستي نور القبلي , بركة سيدي الحسن راجل كسلا تغتي علينا يا إلهي يا سَيّدي ). ثم ملتفتةً للمتحلقين في ركينة البرندة من نسلها : (إنتو يا البوم المشغلين إزاعة السجم دي .. النبي فيكم إمّا قفلتوها .. قالو ليكم " الرادي " بيجُر الصاقعة .. بالتفرطق إضنينكم ديل رجيت الله عليكم)

كلما أرعدت و أبرقت تقول بت المرين ذات دعواها لذات السماء الغضبى , و تشتم ذات سبها لتعود تنكمش داخل فراشها الهبابي رعباً و قلة حيلة .

ثم لما تواصل الماء هطولا , قاموا فسحبوا اللحفات و المراتب و تبروقة الصلاة الكبيرة جرباء الصوف ، و " برش الدخان - الملفوف على فركته - و البنابر الخشبيات الثلاث و سراويل و عراريق حاج صالح المنشرات على الحبل البلاستيكي . و سحبوا الطاولة الخشبية الكبيرة , و عنقريب المخرطة الكبير . انسحبوا جميعهم اتقاء الماء الذي انفتحت له قِرَب السموات . إلا مامون أبى و استكبر :

 (شكشاكة ياخ .. دي شكشاكة ساكت ولّلاي , ما زي مطرة ناس عمتي فوزية حقت بالليل ديك .. ياخي ديك , ديييييييييييينك كانت شديدة شدة ، ديك الإتزلق فيها روري عمك رمضان جوه خور التُرب ) . ذلك ، و بقى مامون تحت الوابل الخريفي و تحت انهمار لعنات بت المرين عليه لأبو اليوم الذي جاء به .

كان مامون التبيعة معتوهاً كبيرا .. أقول لكم .

ما اهتم كثيرا بالمطر , لا و لا بالرعد و اللعنات , و الإستجداءات . فبقي " متداغلاً " يتمترس بالبطانية الصوفية الرمادية بالخط الأحمر الباقية من مخلفات عهدة الجيش , و التي ورثها عن خاله عباس الأورطي . تلفع المعتوه بها و تدمدم منتصفاً للسرير . ثم لما أعياه النوم قام يلف اللحاف " المائي " هارعاً لداخل البرندة , ليكاد يهوي منزلقاً من لزوجة طين الحوش الذي تحول بركة مائعة .

قالوا : فلما حاول مامون التبيعة الإستناد بحمله " اللحافي " المترع الثقيل على أيما سندٍ يقيه شر السقطة ، لم يجد أقرب إليه من شباك الخشب الكبير . فأناخ بكلكله عليه , لينهار الشبك الطلل القديم آخذاً معه " حلق " الشباك .. و العتب الأسمنتي و " قرمةً " كُبرى من مدماكه الطين اللبِن .

قالوا أنّ جده صالح ود الكرسني بقى لعشرة أيامٍ يرتاد فيهن " البصير ود خوجلي " في أقصى القوز ليرد عليه كتفه الذي " خلعته " له هبركة حلق ذاك الشباك المسكين و هو لا إيدو لا كراعوا و في أمانة الله يرقد كعهده الدائم تماماً بين مدخل البرندة و سريحة الحوش الجوانية تماماً تحت ذاك الشباك المجني عليه ، متوسداً ضراعه و متلفعاً بالتوب النقادي القديم ، من قبل أن ينهار عليه المعتوه مامون و اللحاف و المدماك و الشباك و القرمة الكبرى للأسمنت الخرصاني . فما أفلحت جبيرة الكتف و لا الكي و لا الفهق و المليخ .. حتى انهم حجموا له كامل ظهره و لا طائل . فكان أن بقي حاج صالح " عضيراً " حتى أخذ صاحب الوداعة وداعته .

ما علينا .. أقول طنطن مامون ليلتها مغضباً و محنقاً من جده حاج صالح و " شوبيره " كما أسماه :

( جدي ياخ وللاي إتّ دايماً بتلاوز لي , عليك دينك كتّ أتكل ليك في شنو ؟ زاتو الحمدوللاهي إتّ ما كتّ جنبي .. و الله لو كتّ إتكلت عليك , كت قلعت ليك حلقك إتّ زاتك .. صاح ؟ ) ..

قال بذلك ماطاً شفتيه الغليظتين لأقصى تلاليشها – يفعل التبيعة ذلك حين يتملكه الغضب أو الفرح أو ساكت كده بس –

لم يحر حاج صالح جوابا , فهمهم منكساً الرأس مسقطاً في يده : ( ياربي ليك الحمُد يارب .. الله لا كسّبك و لا غزّ فيك بركة يا ود عطانة بركة الأوليا ) .

الكوكة :

حكوا فقالوا :

فقط في يوم الخميس , و قليلاً قبيل أن يفرش " منعم الجاك " برشيه المهترئين لصلاة العصر أمام الزاوية الطينية ذات الطوفات الطينية الثلاث . فقط حينها يطل ( عبدالله النقادي ) :

- طالب من الله

- و من كرم الله

- و من جود الله

- و مما اعطاكم الله

- جلابية في سبيلي الله

- عبدالله

- طالب

- لله

و قد كان متسولاً وسيماً قسيما أشيبا أبيض البشرة حلو الصوت .. منغمه , بجلبابٍ متسخٍ و عمامة هي أصغر من أن تسمى بذلك , ثم بجيوبٍ في الجلباب مكتنزة متكورة امتلاءً بما لا يعرف كنهه أحدا . تلك كانت ملامحه في كل عصرٍ من أيام الخميس و على مدى سنوات طوال .

قالوا : و قد كان صاحب " كوكة " !! .. هكذا .

كل ما عرفه الصبية عن تلك النصيبة المسماة كوكة , أنها كانت تخرج صوتاً غريباً إن أُحرِقت لها ريشة طائر عن قرب . و أن ما من أحدٍ قد سمع ذاك الصوت البديع من سنوات بعيدات . لكن بت المرين ما كفت في كل مناسبةٍ عن الجزم بسماعها لصوت كوكة " ميدوب " الفلاتي . و انه كان يعمل زمانها مكوجياً في دكانة منصور أب لكيلك . و أن أخوها المرحوم " بشرى " كان قد غافل " ميدوب " و وضع له ريشات حمام في المكواة الحديدية المجمرة , و ان ميدوب حين اشتم رائحة الريح المحروق جرى إلى داخل الدكانة فتقرقب ببطانية التفريش القديمة , و أنه تصادف أن الصبي محمود ود ناس باشاب كان داخل الدكانة حينها لاستلام هدوم .. فقطع قلبه هجمة " ميدوب " داخلاٍ , و ذاك الصوت الغريب خارجٌ من سرواله , فبقي يتراجع و هو يردد في خوف : فِسسسسس ... فسسسسس .

قالوا , فاستهوت مامون التبيعة تلك الأقصوصة , و راح يؤسطر لها على مسامع الشفع من صبية الحي .. فقضت عليهم المضاجع .

: شفت صوت الضب ؟ .. شفتو ؟ بس ياهو . قال " همزة " بذلك , فأمن عليه " الفاتح " و " عصام جِنجة " . و زاد عصام فقال : ( أنحنا زاتنا مره كده في ربك سمعنا صوتا ولّلاي . شفتا , زي كجكجة الضب , هي حقت زول كده كان ديّاشي اسمو " برين " , شفت لمن حرقنا ليهو صوفة الحمامة قامت الكوكة حقتو كوركت كواريك .. أنحنا قمنا جارين طوالي عشان لو عضتنا بتقوم تعادينا و بنكوّك , يُمه بتول قالت كده ) .

قال مامون التبيعة حاسماً للكلام - فهو الأعتى و الأكبر و الأضرط - , قال بأنه أعد العدة لعبدالله النقادي : ( إتّو دايرين تسمعوها .. صاح ؟ .. عاين عاين , أنا بتلبد ليكم ورا زريبة ناس " قسِم " . شفت لمن النقادي يقيف جنبها إنتو أعملو لي حركة كده . انا بولع الصوفة طوالي . إتّو بس أسمعوها كويس .. طيب ؟ ) .. و قد كان .

تمترس الشفع عند زاوية " دكان فضُل " . جاء عبدالله النقادي فمر على بيت ناس " عبد اللطيف الدنقلاوي " , ثم إلى ناس " حاج مصطفى شاويش " , فـ " يوسف القبطي " و إلى بيت ناس " حُسنة بت الضكير " حتى وقف بباب ناس " قسم " و تماماً عند الركن الشرقي للزريبة حيث اختبأ " التبيعة " . ثم تنحنح عبد الله النقادي و أطلق نغمته فيما يشبه المديح :

- طالب من الله

- و من كرم الله

- و من جود الله

- و مما اعطاكم الله

- جلابية في سبيلِ الله

- عبدالله

- طالب

- لله

قليلٌ بعد , حتى ارتفع دخانٌ خفيف من وراء سور الزريبة !! .. لكن ما من شيء حدث ! .. و ظل عبدالله النقادي واقفاُ مادحا .

خرج مامون من مخبئه محبطاً فلحق به الصبية , كان يحمل كومة من الريش واقفاً قبالة عبدالله النقادي : ( كوكتك كوركتْ ؟ .. ما كوركت .. صاح ؟ ) ..

نظر إليه عبدالله النقادي .. و إلى عصابة الشفع . ثم ملاوزاً واصل مديحه لناس " قسم " ..

: ( أسمع هووي , هي بتكورك كيف ؟ .. صحي عندها خشم كده هناي كده ؟ .. هي قاعدة وين هي ؟.. شغلها لينا .. دايرنها تكورك لينا )

ذُهِل عبدالله النقادي فانتهرهم في توجسٍ قلِق , و اهتاج غاضباً لأول مرة منذ عرفه الناس : أعوزو بللاه .. أعوزو بللاه - ثم صائحاً في خوف حقيقي و مسكنة - يا قسم .. يا حاج مصطفى .. يا ناس تعالو لمو العيال دول .. اعوزو باللاه .

قال بهذا ثم أسرع الخطو مهرولاً , خلفه ركض الصبية يقودهم مامون : ( ويييي ويييي عبدالله اب كوكة .. : ويييي ويييي عبدالله اب كوكة ) .

قالوا : في جريه سقط الرجل إلى خور المدرسة الذي آل إلى مكبٍ للنفايات , فقفز مامون التبيعة إليه و جثم على صدره محاولاً استكشاف موقع الكوكة من عبدالله . ماداً طراريمه الغليظات بقي يصيح : ( شغلها لينا .. شغلها .. شغل الكوكة ياخ عليك دينك ) ..

قالوا : كسر عبدالله النقادي حوضه فلزم المستشفى شهورا جراء القفزة الشهيرة تلك . ثم لم يره أحدهم في الحلة لسنوات . فيما بقي مامون التبيعة لائماً للشفع - و أيضاً لسنوات - :

( كلو منكم .. كنتو تولعو الصوف ياخ و أنا مثبتو ليكم في الكوشة .. هسه كنا عرفنا حِس الكوكة كيف .. صاح ؟ )

 

 

مامون التبيعة 2 :للكاتب عماد عبدالله

 

 

مامون التبيعة
"في سيرة الظل من العويش إلى اللبلاب"

 2

عماد عبدالله

 

 عشا الميتين:

(الحارة ما مرقت ,ست الدوكة ما ظرطت (..

غناها مامون – قالوا – مع شفع الحلة منتقلين من دارٍ لدار و على طول الحي من أول النهار لرابعته. يتقدمهم مامون - أعتاهم و الأطول - و يرفع عقيرته كواريكاً حين تصل الأهزوجة إلى حيث : قالت طوط .. فيصر مامون عليها , و يتلكأ عندها و يعيد ليكرر .

يومها كان يوماً للرحمتات , و الصيف لافح حتى انك لتبصر "الرهاب " على فقط مبعدة ثلاث بيوتٍ منك . جاء الشفع " كورجة " إلى باب الزنك اللبني الكبير لبيت " جاد الله الحلاق " . و الشفع :أمة أفرزتها البيوت كلما تقدمت الشمس لمنتصف سمواتها , فتخرج البيوت مخاليقها الساكنيها ثقلاً وراءه ثقل : شفع و أغنام و جداد و كلاب و كدايس . فتحشد لهم الشجرات النيمات الثلاث ظلها المشتبك مسدلاً , و تحته تفور حياة الحي : نسوة ينضفن الخدار لأخريات يغسلن الملابس , لستات الفول و التسالي , للماشطات و الممشوطات , لعبد الكريم سيد القش و عوض الله بتاع الداندرمه . تظل الشجرات يعبأها الحي ما اشتد صيف الصيف و زنخت البيوت و احترّت , حتى التأم الشفع هناك قوماً بلا عدٍ .

قرع الشفع و قرعوا على ما يحملون من جوالين و آنية حديدية قديمة ,و رددوا طويلاً : الحارة ما مرقت ست الدوكة ما ظرطت , و لا حياة لمن تنادي !!!زمانٌ مرّ و هم لا يبرحون باب الدار و يهزجون قارعين على ما يحملون في إصرار . خرج لهم جاد الله أخيراً و في إثره حجة بخيتة زوجته : (فرتقوا يا هووووي .. بلا ست الدوكة بلا بتاع .. يللااااا ). و كان جاد الله حلاقاً شهيرا , يجتمع عنده الحي بأكمله مساءا .. تترى الحكايات عند باب دكانته و يعلو صوت الرجال بالونسة و القهقهات ,فيفتون في السياسة و الكورة و التعليم و الأندية و الإندايات و و و و .. ثم ما يتبقى منهم حين الليل يفلل غير ثلاثتهم : جاد الله و صلاح حريقة و كمال حسبو . فيخرجون الجركانة الشهيرة و يعاقرون الليل غناءٍ و أنسا .

مامون وحده كان من وقف في وجه جاد الله مصراً على الغناء عالياً و التركيز على تلك ( الطوط ) في ذلك المقطع العجيب , يلقيها على وجه جاد الله من مقربة!! غضب جاد الله فأخذ من مامون غطاء الحلة الذي كان يحمل , و " لفخه "به على وجهه . قالوا أن ماموناً بكى و بكى و مرغ معصمه و كم العراقي الدبلان بسوائل وجهه .. و هتف في وجه جاد الله الحلاق و هو يبكي : (أدونا الفتة .. تطقني في راسي ليه ياخ ؟ أدونا الفتة )- ثم مكوركاً عالياً - (يا جعانييييين , ما بنمشي .. و الله الليلة ما نمشي . خالتي بخيتة دي زاتا فتتها كعبة) . ثم و فيما يشبه حصوله على كنز الكلام : (أمي قالت خالتي " بخيتة " في بيت الطهور حق ناس عبدالله قرني .. قالت خالتي بخيتة قالت طوط خلت النسوان يمرقن جري , بسسس (!!

قالوا أن جاد الله سمع ذلك , و أيضاً سمعت به أمة محمد القائمة تحت الشجرات النيمات , و سمع به العابرون للسوق .. كما سمع به الباعة المتلصصون بالنهار تربصا . قالوا فأقسم جاد الله على قتل مامون يومها , و على أثره انطلق أما مامون فللريح أطلق ساقيه , و اعتفرت الحلة في وسطها الترابي الفسيح جراء المطاردة تلك , لولا ان حالةً من " بيتانٍ " و ساقٌ التفّ بساقٍ , لحالة غثيان حلت بجاد الله منعته من اتصال الجري خلف مامون التبيعة , فقنع من الغنيمة بالإياب .

ظلت بخيتة منغلقة على بيتها , و لشهور من بعد عشا الميتين الشهير ذاك ما رأتها العالمين , من بعد أن طارت شهرتها بين الناس : ( بخيتة أم طوط ) ..قالوا فأغلق جاد الله الدكانة سحارة الحي , و هجر أصيحابه و هجرته الشهرة التي كانت قد انتقلت إلى حرمه إثر الحادثة تلك . و ما افتقده الناس .. إلا من كمال حسبو الذي بقي يروده على استحياءٍ و بين فتراتٍ متقطعاتٍ طويلة . يجيئه بلا غناء و لا ونسة تقتل صمت الليل بالقهقهات .

بقيت بخيتة ام طوط على سيرةً الألسن و جاد الله راجل بخيته ام طوط عاريٍ من شهرةٍ إلا ذاك الإسم المهين ذو التبعية , قيل حتى قيض الله لهم رحولاً من حلةٍ فيها مامون التبيعة .. فرحلوا .